1972 оны Мюнхены олимп дэлхийн спортын түүхэнд тод мөр үлдээсэн наадам юм.Зөвлөлтийн гимнастикч Ольга Корбутын ид шидийн гэмээр ялалт,ЗХУ-ын сагсан бөмбөгчдийн дэлхийг донсолгосон гайхалтай хожил,Израилын тамирчдыг барьцаалсан эмгэнэлт үйл явдлын зэрэгцээ энэхүү олимп "Голиафыг ялсан Давидын агуу ялалт"-аар хүн төрөлхтөний сэтгэл зүрхэнд тод хоногшин үлдсэн юм.
Германы бөх Вильфрид Дитрих эх нутагт нь зохиогдсон 1972 оны Мюнхены олимпид амжилтгүй оролцож түүхэндээ анх удаа олимпийн наадмын медалийн тавцанд гарч чадсангүй.Гэсэн хэдий ч хувь заяаны эрхээр чухам энэ наадам л дэлхийд алдар нэрээ үүрд дурсгах боломжийг түүнд олгосон.Тэрээр алдарт "зууны шидэлт"-ийнхээ ачаар Америкийн "хүнд жингийн мангас" Крис Тейлорыг ялсан юм.
"Зууны шидэлт"-ийн агшинг хальсанд буулгасан Шведийн фото сурвалжлагч Улле Сейболдын зураг олимпийн түүхэнд хамгийн шилдэг зургын нэгээр яах аргагүй тодорч үлдсэн байдаг.
Тухайн үед хүнд жингийн бөхчүүдэд жингийн хязгаарлалт тавьдаггүй байж.Дэвжээн дээр 184 см өндөр,100 дөнгөж гарсан кг жинтэй ,39 настай ахмад бөх Дитрих өөрөөсөө 12 нас дүү ,196 см өндөр ,200 кг жинтэй америк залуу эрийг тэвэрч шидэх мэхээр ялж байгааг төсөөлөхөд бэрх.
Дуулиант ялагдлынхаа дараа, Тейлор хувцас солих өрөөнд ороод багийн нөхдүүддээ " ингэж ялагдсан"- даа үнэхээр итгэхгүй байна " Намайг дэвжээнээс сэв хийтэл өргөөд,шидчих хүн дэлхий дээр байдаг гэж бодсонгүй,би алдаа хийлээ " гэжээ.
Дашрамд хэлэхэд 1972 оны Мюнхены олимпод манай алдарт Х.Баянмөнх аварга -100 кг -ийн жинд мөнгөн медаль хүртсэн байдаг.Харин жудо бөхийн төрөлд Монголын анхны мөнгөн медаль хүртсэн алдарт Буядаа маань допингийн хэргээр медалиа хураалгуулж байсан түүхтэй.Тэр үеийн удирдлагууд бүх бурууг Буядаа эрхэм рүү чихээд өөрсдөө цэвэр үлдсэн түүхтэй.Яг чөлөөтийн Орхон шиг л юм болсон.Улс орныхоо төлөө барилдаж олимпийн мөнгөн медаль хүртээд адлагдсан хүн бол "Агуу Буядаа" эрхэм яах аргагүй мөн билээ.Түүний олон сайхан шавь Монгол улсын жудог хөгжүүлэхэд их хувь нэмэр оруулсан.Буядаа бол "чимээгүй баатар" билээ.
