ШАТАХУУНЫ ҮНИЙН ЗӨВЛӨЛ СҮҮЛИЙН ХАГАС ЖИЛД НЭГ Ч УДАА ХУРАЛДСАНГҮЙ.

115 0

Шатахуун импортлогчид жижиглэнгийн үнээ удаа дараа нэмсэнтэй холбогдуулан Шударга өрсөлдөөн, хэрэглэгчийн төлөө газраас шалгалт хийжээ. 

Өнгөрсөн гуравдугаар сарын 26-нд АИ-92 төрлийн шатахууны үнэ нэг литр нь 1,819 төгрөг байсан бол энэ сарын 28-нд 1,980 төгрөг болж өссөн. Энэ нь Оросын “Роснефть” компаниас манайд нийлүүлж буй үнэ өссөнтэй холбоотой хэмээн шатахуун импортлогчид тайлбарласан. Гэтэл шатахуун импортлогч 17 компаниас тус газарт ирүүлсэн жижиглэнгийн үнийн мэдээлэл, өртөг болон ашиг, алдагдлын тооцооллоос үзэхэд гадаад хилийн үнэ өссөн ч жижиглэн борлуулалтын үнийг 97-161 төгрөгөөр нэмэгдүүлэх нөхцөл үүсээгүй байна гэж ШӨХТГ-аас үзжээ.

Өөрөөр хэлбэл, компаниудын үйл ажиллагааны зардлыг хянаж үзэхэд, АИ-92 төрлийн шатахуун литр тутамдаа 30-100, дизель түлш литр тутамдаа 270-289 төгрөгийн ашигтай байхад жижиглэн борлуулалтын үнийг нэмэгдүүлсэн гэдэг нь тогтоогдсон байна.

Энэ хүрээнд Засгийн газар болон салбарын яам, агентлагаас яаралтай авч хэрэгжүүлэх шаардлагатай арга хэмжээнүүдийн саналаа Ерөнхий сайд, Шадар сайд, ЗГХЭГ-ын дарга нарт хүргүүлжээ. Тухайлбал, аж ахуй эрхлэгчдээс ирүүлсэн өртгийн тооцоололд үйл ажиллагааны зардал нь тухайн компанийн бүтцээс хамааран харилцан адилгүй байдаг аж.

Гэтэл Засгийн газраас шатахуун, түлшний жижиглэнгийн үнийн зохицуулалтыг хийхдээ Сангийн яамны тооцооллыг үндэслэсээр иржээ. Сангийн яам шатахуун импортлогчдын үйл ажиллагааны зардлыг тооцохдоо компани тус бүрийн үйл ажиллагааны зардлын дүнгээр тооцдоггүй, нэг литр шатахуун борлуулахад гарах үйл ажиллагааны зардлыг 225 төгрөгөөр, зээлийн хүүг 18 хувиар тооцдог байна. Тиймээс салбар хариуцсан эрх бүхий байгууллагууд компани тус бүрийн санхүүгийн тайланд нарийвчилсан тооцоо хийж, өртгийг нь бодитоор тооцох шаардлагатай гэж үзжээ.

Мөн өнгөрсөн хугацаанд Засгийн газраас шатахууны үнийг тогтвортой байлгах зорилтын хүрээнд Монгол Улсад импортолж буй газрын тосны бүтээгдэхүүний хилийн үнэ, валютын ханшны өөрчлөлттэй уялдуулан татварыг нэмэх, бууруулах, тэглэх хүртэл зохицуулалтыг авч хэрэгжүүлж ирсэн байдаг. Хамгийн сүүлд өргөн хэрэглээний А-80, АИ-92 төрлийн шатахууны татварыг тэглэх хүртэл арга хэмжээ авсан ч аж ахуй эрхлэгчдийн зүгээс шатахууны үнийг удаа дараалан нэмэгдүүлсээр байгаа юм. Иймд татварын зохицуулалтад хамрагдаж буй компаниудтай гэрээ байгуулж, зөвхөн жижиглэнгээр худалдаалж байгаа худалдаа эрхлэгчдэд татварын зохицуулалтыг олгодог болохыг зөвлөсөн байна.

Үүнээс гадна “Газрын тосны бүтээгдэхүүний хангамж, үнийг тогтворжуулах асуудлыг зохион байгуулах, хяналт тавих үүрэг бүхий төр, хувийн хэвшил, иргэний нийгмийн байгууллагуудын хамтарсан зөвлөл”-ийн үйл ажиллагааг тогтмол болгох, ажлын зохион байгуулалтыг сайжруулах санал гаргажээ. Тухайлбал, энэ он гарсаар шатахуун импортлогчид жижиглэнгийн борлуулалтын үнээ өнгөрсөн сард хоёр удаа, энэ сард нэг удаа нэмэгдүүлснээр шатахууны үнэ дээд тал нь 204 төгрөгөөр нэмэгдсэн. 

Энэхүү үнийн өсөлттэй холбогдуулан Шударга өрсөлдөөн, хэрэглэгчийн төлөө газраас “Газрын тосны бүтээгдэхүүний хангамж, үнийг тогтворжуулах асуудлыг зохион байгуулах, хяналт тавих үүрэг бүхий төр, хувийн хэвшил, иргэний нийгмийн байгууллагуудын хамтарсан зөвлөл”-ийг яаралтай хуралдуулж, шатахууны жижиглэнгийн үнийг тогтвортой байлгах талаар шуурхай арга хэмжээ авч ажиллах хүсэлтийг Уул уурхай, хүнд үйлдвэрийн сайд, Хамтарсан зөвлөлийн ахлагч Д.Сумъяабазар, Ашигт малтмал, газрын тосны газарт удаа дараа хүргүүлжээ. Гэвч үнийн зөвлөлийг өнгөрсөн оны аравдугаар сарын 18-наас хойш өнөөдрийг хүртэл хуралдаагүй байгаа аж.