Монголын үндэсний цахим их дэлгүүр

Баян ба ядуу аавуудын тэмцэл

53 0

Бяцхан хүүгийн аав ажилгүй, орлогогүй, сэтгэл гутралаа хямдхан архиар тайлдаг олон олон монгол эрчүүдийн нэг. Өнгөрсөн 2017 онд амиа егүүтгэгчдийн 87 хувь нь эрчүүд байсан...харин Батзориг нарын нөхөд ард түмэндээ ажлын байр, цалин орлого, амьдрал болж очих учиртай ЖДҮ-ийн зээлээс тэрбум, тэрбумаар нь суйлчихсан, магадгүй тиймээс л жаалхүүгийн аав өнөөдөр ийм байдалтай гудамжинд хэвтэж байна...согтоод уначихсан аавыгаа даахгүй ч гэсэн аваад харихыг дэндүү ихээр хүсч буй хүү. Батзориг ба энэ хүүгийн аав. Баян ба ядуу аав. Өнөөгийн нийгэм ийм хоёр туйлд хуваагдчихлаа. Ингэхээс ч аргагүй. Харин улс төр дэх нөхцөл байдал үнэн хэрэгтээ бас л Парламентийн ба Ерөнхийлөгчийн засаглалын төлөөх хоёр тойрогт хуваагдан, хэн хэнийхээ эсрэг байж болох бүх боломжоороо нүүж байна. Энэ удаа нүүдэл хийх Хүрэлсүхийн ээлж ирэв. Дашрамд өгүүлэхэд 2012-2017 онд хязгааргүй эрх мэдэл бүхий хоёр хүн Монголын улс төрд мэндэлсэн. Тэд хамгийн том эрх мэдэл бүхий УИХ-ын дарга, мөн ялалт байгуулж олонх болсон намын дарга хэмээх асар өндөр хоёр албан тушаалыг 2012-2017 онд хавсран хашиж ирсэн. Эхнийх нь З.Энхболд. Хоёр дахь нь М.Энхболд. Энэ хоёр хүнийг УИХ-ын дарга байх үед намын гишүүд нь тэдний нүдэн дор бүлтэлзэн сууж, гараа өргө гэвэл өргөөд, буулга гэвэл буулгаад, батал гэсэн хуулийг ньтбаараггүй баталдаг байв. Ийм тохиолдолд төр мафижих илүү амархан. Жүжиг тоглох ч амархан.Тэгвэл Хүрэлсүх гарч ирснээр эрх мэдлийн эл шударга бус хуваарилалт үгүй болж, парламентад олонх болсон намын дарга нь Ерөнхий сайд болдог олон жилийн турш уламжлал болсон зарчим эргэн ирэв. Түүний энэ нүүдэл оновчтой байсныг одоо бид харж байна. Өнөөдөр Ерөнхий сайд буюу МАН-ын дарга Хүрэлсүх гурван ч том албан тушаалтанд ажлаа хүлээлгэн өгөх санал гардуулчихлаа. Дашрамд хэлэхэд У.Хүрэлсүх бол УИХ-ын гишүүн бус, түүнд парламентаас баталсан, тодруулбал Оюунчимэг, Даваасүрэн нарын хэлдгээр ажлын байр болгож олгосон Ерөнхий сайд хэмээх албан тушаалаас өөр эрх мэдэл үгүй. Нөгөө талаар тэр бол олон жижиг фракцад хуваагдчихаад байгаа, өнөөдөр олонх боловч, маргааш лааз өшиглөж ч болох эрх баригч намын дарга. Хууль, төсөв, Засгийн газрын гишүүдийг баталдаг УИХ-ын үнэмлэхүй эрх мэдэл бүхий дарга биш. Тиймээс ч түүний нүүдэл эрсдэлтэй. Унаж, ажилгүй үлдэж ч болох алхам. Гавч мань эр бяцхан хүүгийн аавыг гэрт нь хариулахаар шийджээ. Үүний тулд тэр эхлээд мафийг задлах ёстой. Хууль бус үйлдэлд нэр холбогдсон сайдуудын асуудлаа шийдэх ёстой. Мөн МАН-аас нэр дэвшиж УИХ-ын гишүүн болсон гишүүдтэйгээ ч хариуцлага тооцох ёстой. Тэгээд дараа нь сонгодог парламентийн засаглалыг авчрахын төлөө тэмцэх учиртай. Чадахгүй бол тэр гудамжинд гарна, гудамжнаас тэмцэнэ. Өнөөдөр, эсвэл маргааш тэр зорьсондоо хүрнэ, эсвэл ард түмнийхээ цөхөрсөн итгэл найдварыг тэврээд ойчих болно. Тэгэхээр энэ бол баян ба ядуу аавуудын тэмцэл. Зээлтэй болон, зээл олддоггүй аавуудын тэмцэл. Ажилтай болон ажилгүй аавуудын тэмцэл...эсвэл мафи ялна, эсвэл ард түмэн. Хүүгийн аав ажилд орж, гэртээ цалингаа аваад харина, эсвэл хэзээ ч харихгүй...